【日本旅遊】日本No.1 溫泉！草津溫泉兩日一夜行程

薇薇

冬天到來，香港未必太有寒冷感覺，想要真正冬天當然要去日本！冬天嘅日本最好玩一定係浸溫泉，一係唔浸，一浸就要浸最好。群馬草津溫泉連續16年獲選成全日本最佳溫泉第一位。呢個位於半山嘅小小地方，憑咩得此成就呢？最好就安排一個兩日一夜之旅，大家睇下以下行程參考啦！

Day 1:

上午：自駕或乘車

去群馬草津溫泉，乘JR的話可直達長野草津口站，再轉乘JR巴士，東京前往全程約2.5小時。自駕的話建議先去輕井澤玩，再駕車前來約1.5小時。

中午：漫步湯畑

嚟到草津溫泉，最知名一定要數到溫泉大街入面嘅「湯畑」，由一排排木箱排成嘅泉水田，泉水由地底湧出後，經木箱將水中礦物沉澱，降低泉水溫度至適合人浸泡嘅水溫。唔單止實用，望過去仲十分壯觀，難怪成為每位遊客必逛之地，而且一到夜晚大家都會換上溫泉浴衣，極有氣氛！

草湯最知名就係呢個湯畑，全日本只得一個。

每位遊客必定要嚟影相留念。

木箱係用作沉澱礦物，兼降水溫。

草津湯畑

地點：草津溫泉大街

中午：尋找草津名物小食

時間尚早，逛過湯畑，可以深入溫泉街，草津雖然唔大，但勝在食店夠集中，其中一定要試嘅就係日本知名嘅「元祖溫泉饅頭長壽店」，每日新鮮即製，皮薄陷靚，分多種口味，紅豆、粟子、青豆、芝麻等，而且提供免費試食，食完邊種口味好食先再買都得。而且包裝得好好，除咗即場食之外，仲可以買幾盒返香港做手信！

元祖溫泉饅頭長壽店係草津必試美食！

個個獨立包裝，可以買走做手信。

全部饅頭都係即日新鮮製造。

元祖溫泉饅頭長壽店

地址：草津町大字草津495-1

營業時間：7AM至8PM

夜晚：傳統溫泉之美

逛過景點食過小食，係時候返酒店！草津為知名溫泉鄉，當然有無數溫泉酒泉；想要Budget之選可以揀返一整棟大樓嘅酒店，稍為鬆動就當然要住傳統日式溫泉酒店，推介呢間「望雲」。離溫泉大街及湯畑只有5分鐘步程，方便大家換浴衣後出去，當中有6個大浴池，分男女去浸，而且24小時開放！當然有溫泉就有懷石料理，可以選擇於房間慢慢食，13道料理款款精緻美味！房價方面，二人一房，連早餐及懷石料理一泊二食都係$2,000左右，每人一千，抵！

望雲為草津最知名溫泉旅館之一。

全館共有6個公共溫泉池，24小時開放。

有和室亦有西式客房，悉隨尊便。

望雲

地址：草津町433-1

預訂：按這裡

Day 2:

中午：登白根山睇活火山

早上先於酒店再浸一轉先，Check-out之後唔需要急住離開草津，因為草津附近嘅白根山，正正就係溫泉水所在。白根山離草津約30分鐘車程，於草津巴士總站就有車前往，再行10分鐘就到山頂。白根山對上一次大爆發為1983年，爆發造成3個小山丘及山頂火山湖，大家可以近距離望到火山湖飄出炙熱濃煙，而且湖水翠綠，因為極高酸性。不過火山曾於2018年1月有小規模爆發，並且冬天可能會暫時唔畀人上山，出發前先問下酒店職員啦。

草津溫泉嘅泉源就係旁邊呢座白根山。

山頂火山湖呈翠綠色，飄出炙熱濃煙。

白根山於冬天很多時會封閉，要留意消息。

白根山

交通：草津巴士總站乘坐巴士再行10分鐘；或於草津纜車站乘纜車登山